काठमाडौ १७ फागुन ।
विभिन्न विद्यार्थी संगठनहरुकै विवादका कारण भोली हुने भनिएको स्ववियु निर्वाचन धेरैजसो क्याम्पसमा प्रभावित हुने देखिएको छ । त्रिभुवन विश्वविद्यालयका अनुसार भोली करिब ४० प्रतिशत क्याम्पसमा मात्र स्ववियु निर्वाचन हुने देखिएको छ ।
त्रिविले तोकेको समयमा ४० प्रतिशत आंगिक क्याम्पसहरुमा मात्र उम्मेदवारी मनोनयन भएकाले अधिकांश क्याम्पसमा निर्वाचन नहुने भएको हो ।
सत्तारूढ दल कांग्रेसनिकट नेविसंघ र प्रतिपक्षी एमालेनिकट अनेरास्ववियुका साथै मधेस केन्द्रित दल आवद्ध विद्यार्थी संगठन लगायतले विभिन्न कलेजमा अवरोध गरेपछि निर्वाचन प्रक्रिया प्रभावित हुदा ६० प्रतिशत क्याम्पसमा निर्वाचन नहुने पक्का भएको हो ।
विद्यार्थी संगठनकै मागमा फागुन १४ मा गर्ने भनिएको स्ववियु निर्वाचनको मिति चार दिनपछि सार्दा समेत विद्यार्थी संगठनहरु नै निर्वाचनका लागि बाधक बनेको त्रिविले जनाएको छ ।
मूख्य गरी ठूला मानिएका राजधानीको कीर्तिपुरस्थित केन्द्रीय क्याम्पस, रत्नराज्य, त्रिचन्द्र, नेपाल ल, विश्वभाषा, शंकरदेव, नेपाल कमर्श, पाटन संयुक्त, महेन्द्ररत्न ताहाचल, अमृत साइन्स, सरस्वतीलगायत क्याम्पसमा तालाबन्दी गरिएको छ ।
त्रिविअन्तर्गत ६० आंगिक र सम्बन्धनका एक हजार ८४ क्याम्पस छन् ।
