काठमाडौ १६ फागुन ।
म्याग्दीको दुर्गम रुम गाविसमा रहेको स्लेट र छाउनी ढुङ्गाको खानी सञ्चालनमा ल्याउन स्थानीयले सरकारसँग माग गरेका छन् ।
रुम गाउँको शिरानमा रहेको सो स्लेट खानीमा गुणस्तरीय स्लेट र छाउनी ढुङ्गा निकाल्न सकिने भएपनि प्रविधिको अभाव र लगानीको समस्याका कारण स्थानीयले थोरै मात्रामा खानीबाट स्लेट र छाउनी ढुङ्गा निकालेर बिक्री गर्दै आएका छन् ।
रुममा रहेको विशाल स्लेट खानीलाई व्यवस्थितरुपमा सञ्चालन गर्न सकेमा दैनिक ३५ जनाभन्दा बढीले प्रत्यक्ष रोजगारी पाउने र राज्यलाई वार्षिक लाखौँ राजस्व प्राप्त हुने सम्भावना रहँदारहँदै पनि सरकारी निकायबाट बेवास्ता गरिएको स्थानीयको गुनासो छ ।
त्यहाँको स्लेट र ढुङ्गा स्तरीय र चिल्लो भएको हुँदा पोखरा, बागलुङ लगायतका ठाउँबाट पनि माग हुँदै आएको छ । हाल खानीको बाहिरी भागबाट निकालिएको ढुङ्गा बेचेर वार्षिक रु २५ लाखभन्दा बढी आम्दानी हुँदै आएको स्थानीयको भनाइ छ ।
