फागुण ,१४ काठमाण्डौं ।
विभिन्न यातायात व्यवशायी , साना राजनीतिक दलका नेताहरु र मजदुर संगठनका प्रतिनिधिहरुले सरकारले आगामी १७ फागुणबाट हटाउने भनेको २० वर्ष पुरानो गाडी विस्थापित गर्नु अघि अनुदान या नयाँ गाडी खरीद गर्दा आयात कर छुट दिन माग गरेका छन् ।
पीडित यातायात व्यवशायी स्वरोजगार मजदुर संघर्ष समितिले आज लगनखेलमा आयोजना गरेको कार्यक्रममा बोल्दै उनीहरुले कमिसनको प्रलोभनमा सरकार र यातायात व्यवशायीहरुले पुरानो गाडी हटाउने चलखेल गरेको समेत आरोप लगायएका छन् ।
राष्ट्रिय बोर्डिङ स्कुल भाडा बस व्यवशायी संघका अध्यक्ष भगवान शाहीले नेपाल जस्तो गरीब देशमा यस्तो निर्णयले आर्थिक हानी पुग्ने भन्दै सरकार सचेत रहनु पर्ने बताउनु भयो ।
फलामको ईन्जिन सही तरीकाले मर्मत भएको छ वा छैन भनेर अनुगमन नभएको भन्दै उहाले सरकारले कुनै विकल्प विनानै यो कदम चालेको शाहीले बताउनु भयो ।
कार्यक्रममा एकीकृत राष्ट्रवादी पार्टीका माधव प्रसाद भण्डारी , राष्ट्रिय लोकतान्त्रिक ट्रेड युनियन महासंघका अध्यक्ष नवराज दाहाल , मातृभूमि पार्टीका ओमकार विस्वकर्मा , स्वस्तिक स्वरोजगार ट्याक्सी व्यवशायी सघका अध्यक्ष प्रकाश बस्नेत लगायतका वक्ताले पनि सरकारको यो निर्णयको विरोध गर्दै विकल्प प्रस्तुत गर्न माग गरेका थिए ।
