काठमाडौ १३ फाल्गुण ।
स्वतन्त्र विद्यार्थी युनियन (स्ववियु) चुनावको विषयलाई लिएर प्रदर्शनीमार्ग स्थित रत्नराज्यलक्ष्मी क्याम्पसमा अनेरास्ववियु र नेविसंघका कार्यकर्ताबीच झडप भएको छ । ‘क्याम्पस हाताभित्र विद्यार्थी परिचयपत्र भएकालाई मात्र प्रवेश गराउने सहमति भएको थियो ।
तर, क्याम्पस प्रशासनले त्यसलाई बेवास्ता गरेको’ आर.आर नेविसंघले आरोप लगाएको छ ।
त्यस्तै, क्याम्पसमा तालाबन्दी भएको अवस्थामा अनेस्ववियुले निर्वाचन अधिकृतलाई थर्काएर जवर्जस्ती उम्मेदवारी मनोनयन दर्ता अघि बढाएको र यसमा क्याम्पस प्रमुखको नियोजित षडयन्त्र नेविसंघको आरोप छ ।
क्याम्पसहरुमा स्ववियुको चुनाव हुन नदिने षडयन्त्र भएपछि त्यस्ता विद्यार्थीलाई लखेट्दा झडपको अवस्था सिर्जना भएको अनेरास्ववियुका सचिव आरसी लामिछानेले बताए ।
झडपमा परी नेविसंघका तीन विद्यार्थी नेता ऋषि पोखरेल, सुरेश सुवेदी र महेश गौतम घाइते भएका छन् । घाइतेको बागबजारस्थित मोडल अस्पतालमा उपचार भइरहेको छ । झडपमा विद्यार्थी दिनेश शर्माको मोटरसाईकल तोडफोड भएको छ ।
