फागुण १४ काठमाण्डौं ।जनयुद्धका प्रथम शहीद दिल बहादुर रम्तेल र झापा आन्दोलनमा शहीद भएका कृष्ण कुईकेल सहित ४ जना शहीदको सम्झनामा नेपाल कम्युनिष्ट पार्टी र क्रान्तिकारी माओवादीले आजदेखि शहीद सप्ताह मनाउदै छन् ।
२०५२ साल फागुण १ गते माओवादीले शुरु गरेको जनयुद्धको क्रममा फागुण १४ गते आजकै दिन प्रहरीद्धारा हत्या गरिएका गोरखाका दिल बहादुर रम्तेल १० वर्षका मात्र थिए । गोरखा देउराली गाविस जराङ ३ का उनी स्कुले विद्यार्थी थिए ।
यस्तै झापाको सुखानीमा २०२९ साल फागुण १९ गते झापा जेलबाट लगेर कृष्ण कुईकेल, रामनाथ दाहाल, विरेन राजबंशी र नेत्र घिमिरेलाई सुखानी जंगलमा हत्या गरिएको थियो ।
यस शहीद सप्ताहको अवसरमा नेपाल कम्युनिष्ट पार्टीले रोल्पाको लिवाङमा पार्टी महाधिवेशनको निर्णय सार्वजनिक गर्न घोषणा सभा सहित कार्यक्रम गर्दैछ भने देशभर विभिन्न कार्यक्रम गर्ने जनाएको छ ।
यस्तै क्रान्तिकारी माओवादीले देशै भर जिल्लाहरुमा शहीद सप्ताह मनाउने जनाएको छ ।
