काठमाडौ १३ फागुन ।
संघीय लोकतान्त्रिक गणतन्त्र नेपालको प्रमुख सुरक्षा अङ्गका रुपमा रहेको नेपाली सेनाले आज देशभर सेना दिवस मनाउँदैछ । आफ्नो स्थापना दिवसका अवसरमा नेपाली सेनाले आज राजधानीको टुँडिखेलस्थित सैनिक मन्चमा विषेश कार्यक्रमको आयोजना गरेको छ ।
नेपाली सेनाले दुई दशकदेखि हरेक वर्ष शिवरात्रिका दिन आफ्नो स्थापना दिवस मनाउँदै आएको छ । सेना परमाधिपति राष्ट्रपति विद्यादेवी भण्डारीको प्रमुख आतिथ्यमा हुने कार्यक्रममा सरकारका उच्च पदाधिकारीका साथै सुरक्षा निकायका विशिष्ट व्यक्तित्वहरुको उपस्थिति रहने जनाइएको छ ।
कार्यक्रममा परेड तथा तोप, बढाइँ, कवाज, आतिस बाजीलगायत विविध कार्यक्रम हुनेछन् । सेना दिवसकै अवसरमा जङ्गी अड्डामा साँझ सास्कृतिक कार्यक्रमसहित विशेष समारोह आयोजना हुने सैनिक जनसम्पर्क निर्देशनालयले जनाएको छ ।
यसका साथै सैनिक मुख्यालय जङ्गी अड्डा मातहत मुलुकका विभिन्न भागमा तैनाथ पृतना, बाहिनी, गण, गुल्म लगायतका निकायमा पनि सेना दिवसका अवसरमा विभिन्न कार्यक्रम आयोजना गरिएको निर्देशनालयले जनाएको छ ।
नेपालको स्वतन्त्रता, भौगोलिक अखण्डता तथा सार्वभौमसत्ताको रक्षाका लागि इतिहासका विभिन्न कालखण्डमा नेपाली सेनाले उदाहरणीय तथा कीर्तिमानी काम गर्दै आएको इतिहास छ ।
संयुक्त राष्ट्रसंघीय शान्ति स्थापनामा पनि नेपाली सेनाको महत्वपूर्ण भूमिका छ । विश्वका कतिपय द्वन्द्वग्रस्त मुलुकमा शान्तिका लागि ज्यानको बाजी लगाउँदै नेपालका ६३ जना सैनिकले जीवन बलिदान दिइसकेका छन् ।
