काठमाडौं, फागुन १२ ।
राजधानीमा जारी नेपाल–दक्षिण कोरिया साहित्य, संस्कृति र कला महोत्सवमा आज नेपाल दक्षिण कोरियाका दुइ दर्जन कविले कविता वाचन गर्दै छन् ।
आज नै डेढ दर्जन नेपाली गजलकारले गजल पनि प्रस्तुत गर्नेछन भने नेपाली कवि र गजलकारहरुले विभिन्न मातृभाषामा सिर्जना समेत प्रस्तुत गर्ने छन् ।
महोत्सवको अन्तिम दिन भोली नेपाली र कोरियाली चित्रकार तथा मूर्तिकारका चित्रकला, मूर्तिकलाको प्रदर्शनी तथा कलाबारे अन्तर्क्िरया कार्यक्रम गरिने बताएको छ ।
नेपाल र दक्षिण कोरियाबीच सांस्कृतिक, साहित्यिक, कलाको आदानप्रदान गर्ने उद्देश्यले नेपाली लेखक संघ र युरासिया कल्चर फोरम, कोरियाको संयुक्त आयोजनामा महोत्सव गरिएको हो ।
महोत्सवमा युरासियाका तर्फबाट ६० भन्दा बढी साहित्यकार, कलाकर्मी, संस्कृतिकर्मीको उपस्थिति रहेका छ भने नेपालका तर्फबाट पाँच सयभन्दा बढी लेखक, कलाकार र संस्कृतिकर्मी सहभागी भएको आयोजकले जनाइएको छ ।
यस्तै महोत्सवको पहिलो दिन हिजो नेपाल र कोरियाका भाषा(साहित्य, संस्कृति, कला र समाजशास्त्र सम्बन्धी आठ वटा कार्यपत्र प्रस्तुत गरिएको थियो भने सोही कार्यपत्र माथि छलफल समेत भएको थियो ।
