काठमाडौ ११ फागुन ।
ऊर्जामन्त्री जनार्दन शर्माले ऊर्जा क्षेत्रमा क्रान्ति नगरी औद्योगिक क्षेत्रमा क्रान्ति सम्भव नरहेको भन्दै मुलुकमा ऊर्जा क्रान्ति सुरु भएको बताउनु भएको छ ।
उद्योग सङ्गठन मोरङको आयोजनामा विराटनगरमा आजदेखिसुरु भएको विराट एक्स्पो ०७३ को उद्घाटन गर्दै उहाँले सरकारले चालु आर्थिक वर्षमै चार÷पाँचवटा जलासययुक्त परियोजना सुरु गर्ने सोचाइका साथ कार्य भइरहेको जानकारी गराउनुभयो ।
कोसी नदीबाट ठूलो परिमाणमा विद्युत् उत्पादन गर्ने प्रक्रिया सुरु भइसकेको उल्लेख गर्दै मन्त्री शर्माले सप्तकोसी अन्तर्गतका भोटे, तमोर र अरुण नदीलाई पहाडी क्षेत्रमा नियन्त्रण गरेर विद्युत् उत्पादन गर्ने र यसबाट तराईमा कोसीको बाढीको जोखिमबाट समेत राहत पुग्ने विश्वास व्यक्त गर्नुभयो ।
उहाँले कोसी नदीबाट उत्पादित विद्युत् पूर्णरुपमा पूर्वी क्षेत्रमै खपत गर्ने भएकाले औद्यौगिक नगरी विराटनगरमा ठूल्ठूला उद्योग सञ्चालन गर्न उद्योगपतिलाई आग्रह गर्नुभयो ।
नेपाल उद्योग वाणिज्य महासङ्घका अध्यक्ष पशुपति मुरारकाले बैंकले चारपटकसम्म ब्याजमा वृद्धि गरेकाले उद्योग धरासायी हुने सम्भावना बढेको बताउनु भयो ।
