काठमान्डौ माघ ११।
आज देखि राजधानीमा नेपाल – दक्षिण कोरिया साहित्य, संस्कृति र कला महोत्सव सुरु हुदै छ । तीन दिन सम्म चल्ने महोत्सवको आज विहान साढे १० बजे प्रधानमन्त्री पुष्पकमल दाहालले उद्घाटन गर्ने कार्यक्रम रहेको छ ।
नेपाली लेखक संघ र युरासिया कल्चर फोरम, कोरियाको संयुक्त आयोजनामा हुन लागेको उक्त महोत्सब कमलादी स्थित नेपाल प्रज्ञा(प्रतिष्ठानमा सञ्चालन हुने छ । नेपाल र दक्षिण कोरियाबीच सांस्कृतिक, साहित्यिक, कलाको आदानप्रदान गर्ने उद्देश्यले महोत्सव गर्न लागिएको आयोजकले जनाएको छ ।
महोत्सवमा युरासियाका तर्फबाट ६० भन्दा बढी साहित्यकार, कलाकर्मी, संस्कृतिकर्मीको उपस्थिति रहने र नेपालका तर्फबाट पनि पाँच सयभन्दा बढी लेखक, कलाकार र संस्कृतिकर्मी सहभागी हुने आयोजकले जनाइएको छ ।
महोत्सवको पहिलो दिन नेपाल र कोरियाका भाषा(साहित्य, संस्कृति, कला र समाजशास्त्र सम्बन्धी आठ वटा कार्यपत्र प्रस्तुत गरिने र त्यसमाथि छलफल हुने लेखक संघका कार्यवाहक अध्यक्ष कवि श्रवण मुकारुङले जानकारी दिनु भयो ।
भोली दुवै मुलुकका दुई दर्जन कविले कविता वाचन गर्नेछन् भने डेढ दर्जन नेपाली गजलकारले गजल प्रस्तुत गर्नेछन् । सो क्रममा नेपाली कवि र गजलकारले विभिन्न मातृभाषामा सिर्जना प्रस्तुत गर्ने छन् ।
अन्तिम दिन नेपाली र कोरियाली चित्रकार तथा मूर्तिकारका चित्रकला, मूर्तिकलाको प्रदर्शनी तथा कलाबारे अन्तर्क्िरया कार्यक्रम गरिनेछ ।
