काठमाडौ ७ फागुन ।
नेकपा माओवादी केन्द्रको हेडक्वाटर बैठकले एकदुई दिनभित्रै तीनै तहको निर्वाचनको मिति घोषणा गर्न सरकारलाई सुझाव दिएको छ ।
माओवादी केन्द्रको हेडक्वाटर बैठकका क्रममा सदस्यले अन्तिम पटक सत्तारुढ कांग्रेस, मधेसी मोर्चा र निर्वाचन आयोगसँग पनि छलफल गरी तत्काल तीनै तहको निर्वाचनको मिति घोषणा गर्न सरकारलाई सुझाव दिएको हो ।
बैठकमा प्रधानमन्त्री तथा पार्टी अध्यक्ष पुष्पकमल दाहालले समसामयिक राजनीतिक परिस्थिति, स्थानीय तहको निर्वाचनबारे सरकारले गरेको तयारी र राजनीतिक दलहरुसँग भएको सम्वादबारे जानकारी गराउनुभएको थियो ।
बैठकले पार्टी सदस्यता नवीकरण, पार्टीका स्थानीय तहका कमिटीहरुको सम्मेलन सम्पन्न गर्ने, बाँकी रहेका जनवर्गीय संगठन र विभागहरुको एकता सम्पन्न गर्ने र निर्वाचनलाई केन्द्रित गरेर संगठनात्मक कामलाई अघि बढाउने निर्णय समेत गरेको छ ।
