काठमाडौ ६ फागुन ।
लागु औषध चरेससहित पक्राउ परेका पाँच जनालाई प्रहरीले आज सार्वजनिक गरेको छ । विराटनगरको एक होटलबाट सूचनाको आधारमा बिहीबार अपराह्न ५१ किलो ४०० ग्राम चरेससहित पक्राउ परेका उनीहरुलाई आज सार्वजनिक गरेको हो ।
पक्राउ परेका लागु औषधको अन्तर्राष्ट्रिय बजारमा करोडौँ मूल्य रहेको प्रहरीले जनाएको छ । पक्राउ पर्नेमा मकवानपुरको टिस्टुङ–५ का १८ वर्षीय प्रतापसिंह गोले र १९ वर्षीय वुद्ध बम्जन, काभ्रेपलाञ्चोक नयाँगाउँ का १८ वर्षीय राम गुरुङ, १७ वर्षीय अरुण गुरुङ र धादिङ भुमेस्थान–१ का १८ वर्षीय मिलन राउतलाई रहेका छन् ।
उनीहरुलाई जिल्ला प्रहरी कार्यालय मोरङले आज सार्वजनिक गरेको हो । उनीहरुले चार वटा चरेसको प्याकेट बनाएर चारवटा सुटकेसमा फ्ल्स बटम बनाएर लुकाएर राखेका थिए । बिहीबार नै जोगबनी भएर भारतको कोलकत्ता जाने तयारीमा रहेको अवस्थामा उनीहरुलाई नियन्त्रणमा लिएको प्रहरी उपरीक्षक सन्दिप भण्डारीले बताउनु भयो ।
उनीहरुको साथबाट रेलको टिकट, पाँच थान मोबाइल, भारतीय मुद्रा १४ हजार ४००, नेपाली मुद्रा रु एक हजार र पाँच थान नेपाली नागरिकताका साथै बस चढेर काठमाडौँबाट विराटनगर आएका पाँच थान टिकट बरामद गरिएको छ ।
उनीहरुमाथि आजै लागुपदार्थ ऐन अन्तर्गत मुद्दा दर्ता गरी कारबाही अगाडि बढाइएको छ । यसअघि, गत पुस ६ गते विराटनगर–२१ बाट भारतको कोलकत्ता बस्ने वर्ष २५ को शेख रिमादलाई तीन किलो ४५ ग्राम चरेससहित प्रहरीले पक्राउ गरिएको थियो ।
