काठमाडौ ६ फागुन ।
विभिन्न कार्यक्रममा सहभागी हुन प्रधानमन्त्री पुष्पकमल दाहाल आज रोल्पा र नवलपरासी जाँदै हुनुहुन्छ । जिल्लामा आयोजना हुने महोत्सव उद्घाटनका लागि उहाँ त्यसतर्फ जान लाग्नु भएको हो ।
प्रधानमन्त्रीमा नियुक्ति भएसँगै उद्घाटन लगायत औपचारिक सभासमारोहमा सहभागी नहुने उद्घोष गर्नुभएका दाहाल पछिल्ला समय विभिन्न जिल्लामा आयोजना हुने औपचारिक कार्यक्रममा बढ्दो छ ।
प्रधानमन्त्री दाहाल आज बिहान नेपाली सेनाको हेलिकप्टरबाट रोल्पा जाने कार्यक्रम रहेको उहाँको निजी सचिवालयले जनाएको छ । प्रधानमन्त्री दाहालले मध्यान्न १२ बजे रोल्पा महोत्सवको उदघाटन गर्ने कार्यक्रम रहेको छ ।
रोल्पामा प्रधानमन्त्री दाहालले स्थानीय निकाय कर्मचारीसंग विकास निर्माणबारे अन्तरक्रिया गर्ने कार्यक्रम समेत रहेको छ । त्यसपछि उहाँ रोलपाबाट सिधै देवघाट महोत्सव उद्घाटनका लागि नवलपरासी जानुहुुनेछ ।
काठमाडौंमा आज सुरु हुने राप्रपाको महाधिवेशनको उद्घाटन सत्रलाई सम्बोधन गर्ने कार्यक्रम भएकाले अपरान्ह ४ बजे उहाँ राजधानी फर्कनु हुनेछ ।
