काठमाडौं, फागुन ३।
विशेष पोलियो खोप कार्यक्रम फागुन १९ र २० गते गर्ने तयारी भएको छ । बालबालिकालाई पोलियो जोखिमबाट बचाउन उक्त खोप कार्यक्रम सञ्चालन गरिएको हो ।
स्वास्थ्यकर्मीको आन्दोलनका कारण खोप कार्यक्रम पछि धकेलिए पनि स्वास्थ्य सेवा विभागले प्राविधिक कारणले रोकिएको जनाएको छ ।विभागका महानिर्देशकमा डा. राजेन्द्र पन्तले तत्काल तराईका जिल्लामा अभियान चलाउन समस्या भएकाले मिति सारेको बताउनुभयो ।
७ र ८ गतेको साटो १९ र २० गते अभियान चलाउने तयारी भएको र मितिको औपचारिक जानकारी भने आज गरिने उहाँले बताउनुभयो । स्वास्थ्य ऐन कार्यान्वयनको माग गर्दै देशभरका स्वास्थ्यकर्मी अहिले आन्दोलनमा छन् ।
सरकारले १५ जिल्लाका पाँच वर्षमुनिका १६ लाख ९२ हजार ३१५ बालबालिकालाई पोलियो खोप लगाउने कार्यक्रम तय गरेको थियो ।
सुनसरी, सप्तरी, सिरहा, धनुषा, महोत्तरी, रौतहट, पर्सा, बारा, कपिलवस्तु, बाँके, बर्दिया, कैलाली, काठमाडौं, भक्तपुर र ललितपुर जिल्लामा यो कार्यक्रम हुने बालस्वास्थ्य महाशाखाले जनाएको छ ।
