काठमाडौ २८ माघ । स्थानीय तहको निर्वाचन छिट्टै घोषणा गर्नुपर्ने माग राख्दै रसुवाका स्थानीय निकायमा कार्यरत कर्मचारीले आज तीन घण्टा कलम बन्द गरेका छन् ।
निर्वाचन लगायत ६ वुँदे माग राख्दै स्थानीय निकाय कर्मचारी संयुक्त संघर्ष जिल्ला समन्वय समिति रसुवाको आह्वानमा जिविस र गाविसका कर्मचारीले आज तीन घण्टा कलम बन्द गर्ने जनाएका हुन् ।
उनीहरुले स्थानीय तहमा कर्मचारी समायोजन गर्दा स्थानीय निकायमा कार्यरत कर्मचारी र अन्य कर्मचारीलाई मिलाएर तह तथा श्रेणीगत रुपमा कर्मचारी समायोजन गर्नुपर्ने, योग्यता र क्षमताका आधारमा जिम्मेवारी दिनुपर्ने, अस्थायी कर्मचारीको उचित व्यवस्थापन गर्नुपर्ने लगायत माग राखेका छन् ।
समितिले आज बिहान १० बजेदेखि दिउँसो १ बजेसम्म कलम बन्द गरिएको सयुंक्त संघर्ष समितिका अध्यक्ष लिलानाथ नेपालले वताउनुभयो ।
गत माघ १९ गतेदेखि नै विभिन्न आन्दोलनका कार्यक्रम गर्दै आएको आन्दोलन समितिले फागुन १ गते गाविस तथा जिविस पुरै दिन बन्द गर्ने जनाएको छ ।
