काठमान्डौ माघ २८ ।
बैंकहरुले तरलताको कारण देखाउँदै जलविद्युत क्षेत्रका लागि सम्झौता भइसकेका ऋणहरुको समेत समयमै रकम उपलब्ध नगराउने गरेको देखिएको छ ।
ऋण सम्झौता भइसकेका आयोजनाहरुका लागि ऋणको किस्ताबन्दी माग्न जाँदा समयमै नपाएको उद्योग वाणिज्य महासंघको उर्जा समितिका सभापति ज्ञानेन्द्रलाल प्रधानले जानकारी दिए ।
उनले बैंकहरुले अहिले सम्झौता भइसकेका आयोजनालाई भन्दा पनि नयाँ आयोजनालाई कर्जा लगानीका लागि प्राथमिकतामा राखेको बताउँछन् । राष्ट्र बैंकले जलविद्युत क्षेत्रमा बैंकहरुले लगानी गर्नुुपर्ने बाध्यकारी व्यवस्था गरेको छ । कृषि र उर्जा क्षेत्रमा मात्रै १५ प्रतिशत लगानी गर्नुपर्ने व्यवस्था छ ।
त्यस्तै उर्जा, पर्यटन क्षेत्र र घरेलु तथा साना उद्योगमा प्रवाहित कर्जा कुल कर्जाको न्युनत्तम २० प्रतिशत पुर्याउँने व्यवस्था पनि कायम गरिएको छ । अनुत्पादक क्षेत्रमा बैंकहरुको लगानी बढ्दै गएपछि केही वर्षअघि राष्ट्र बैंकले यस खालको व्यवस्था गरेको छ । राष्ट्र बैंकले यस खालको व्यवस्था गरेको भए पनि बैंकहरु भने उत्पादनमूलक क्षेत्रमा आकषिर्त हुन सकेका छैनन् ।
जलविद्युत क्षेत्रमा लगानी गर्नुपर्ने व्यवस्था औपचारिकतामा पूरा गर्न बैंकहरुले अहिले अर्को घुमाउरो तरिका प्रयोग गर्न थालेका छन्।
