काठमाडौं, माघ २८।
अख्तियार दुरुपयोग अनुसन्धान आयोगले आफ्नो २६ औं स्थापना दिवस आज विभिन्न कार्यक्रमको आयोजना गरी मनाउँदै छ । दिवसको अवसरमा सशस्त्र प्रहरीको मुख्यालय हल्चोकमा विशेष कार्यक्रम समेत आयोजना गरिएको छ ।
उ्क्त कार्यक्रमलाई प्रधानमन्त्री पुष्पकमल दाहालले सम्बोधन गर्नुहुने छ । २०३२ सालमा स्थापना भएको अख्तियार सार्वजनिक क्षेत्रको भ्रष्टाचारको अनुसन्धान गरी दोषी पाइएकालाई मुद्दा दायर गर्न पाउने संवैधानिक निकाय हो ।
धेरै आलोचना र कम मात्र स्याब्बासी पाउँदै आएको अख्तियारले समय अनुसार अनुसन्धान पद्धती सुधार गर्न नसकेको आरोप लाग्ने गरेको छ ।
लामो समय पदाधिकारी विहीन हुँदा खासै गतिविधि गर्न नपाएको अख्तियारले प्रमुखमा लोकमानसिंह कार्की नियुक्त भएपछि गति लिने अपेक्षा गरिएपनि कार्कीका कारण उल्टै अख्तियारको शाख गिर्न पुगेको छ ।
विभिन्न सूचकले देशमा भ्रष्टाचारको अवस्था घट्न नसकेको देखाइरहेका बेला अख्तियारले गुमेको शाख आर्जन गर्दै अनुसन्धान पद्धतीलाई बलियो बनाउनुपर्नेमा अख्तियारका पूर्व आयुक्त तथा आयुक्तहरुले जोड दिएका छन् ।
