काठमाडौ २५ माघ ।
कन्चनपुरको भीमदत्तनगरमा आज दिउँसो दुई ओटा मोटरसाइकल आपसमा ठोकिएर दुर्घटनामा दुई जनाको मृत्यु भएको छ । दुर्घटनामा अन्य तीन जना घाइते भएका छन् ।
भीमदत्तनगर नगरपालिका–१८ खैरभट्टीचोकमा सुरतबहादुर पार्कीले चलाएको से १ त २२६४ नम्बरको मोटरसाइकल र विपरीत दिशाबाट आउदै गरेको म १ प ३३३४ नम्बरको मोटरसाइकलसँग ठोक्किएर दुर्घटना भएको प्रहरीले जनाएको छ ।
दुर्घटनामा परी मृत्यु हुनेमा धनगढी नगरपालिका–५ तारानगरका २८ वर्षीय सुरतबहादुर पार्की र बेदकोट नगरपालिका–८ का २३ वर्षीय रहसी ओखेडा रहेका भीमदत्तनगर प्रहरीले जनाएको छ ।
दुर्घटनामा पार्कीले चलाएको मोटरसाइकलमा सवार दुबैजनाको मृत्यु भएको हो । अर्को मोटरसाइकलमा सवार चालक मेघराज जोशीसहित तीनजना घाइते भएका छन् ।
घाइतेहरुको अहिले महाकाली अञ्चल अस्पतालमा उपचार भइरहेको छ । दुर्घटनाको बारेमा थप अनुसन्धान भइरहेको जिल्ला प्रहरी कार्यालय भीमदत्तनगरले जनाएको छ ।
