काठमाडौ २५ माघ ।
शिक्षामन्त्री धनिराम पौड्यालले शिक्षकहरु गुटगत राजनितिमा फसेका कारण सामुदायिक विद्यालयहरुको शिक्षाको स्तर खस्कँदै गएको बताउनु भएको छ । राजनीति गर्ने भए शिक्षकको जिम्मेवारीबाट मुक्त हुनुपर्ने उहाँको तर्क थियो ।
झापाको लखनपुरस्थित आदिवासी रङ्गशालामा सुरु भएको बाल महोत्सवको आज उद्घाटन गर्दै उहाँले यस्तो बताउनु भएको हो । मन्त्री पौडेलले राजनीति गर्ने शिक्षकको अब विद्यालयमा काम नभएको उल्लेख गर्दै राजनीतिमा संलग्न हुन चाहने शिक्षकले शिक्षण पेशा छोड्नु पर्ने बताउनु भयो ।
मन्त्री पौड्यालले नेपालको शिक्षा व्यावहारिक नभई प्रमाणपत्रमुखी हुँदा शैक्षिक बेरोजगारीको सङ्ख्या बढेको बताउनुभयो । ‘ नेपालको शिक्षालाई आठौँ संशोधनले प्राविधिक र व्यावसायिक बनाएको छ अब शैक्षिक बेरोजगारको सङ्ख्या घट्छ ।” मन्त्री पौडेलको भनाई छ ।
शिक्षामन्त्री पौडेलले सरकारले ल्याएको शिक्षा ऐनको आठौँ संशोधन बालबालिकामैत्री रहेको दाबी गर्दै यसको कार्यान्वयनका लागि सबैको साथ आवश्यकता रहेको धारणा राख्नुभयो । यही माघ २९ गतेसम्म चल्ने महोत्सवमा झापा, इलाम, सुनसरी र धनकुटाका गरी करिब डेढ लाख बालबालिकाले अवलोकन गर्ने अनुमान आयोजकको छ ।
