काठमाडौ २१ माघ ।
भौतिक पूर्वाधार तथा यातायातमन्त्री रमेश लेखक र नेपालका लागि चिनियाँ राजदूत यु होङबीच आज भेटवार्ता भएको छ । मन्त्रालयमा आज भएको भेटमा सम्झौता भई काम भइरहेको चक्रपथ विस्तार आयोजना र अरनिको राजमार्गको काम समयमै सक्ने लगायतका विषयमा छलफल भएको जनाइएको छ ।
सो क्रममा राजदुत होङले चीनको सहयोगमा सञ्चालित आयोजनाका काम तोकिएको समयमा सम्पन्न हुनुपर्नेमा जोड दिनु भएको थियो । सो अवसरमा दुवैतर्फबाट आएका समस्या समाधानमा जोड दिइएको मन्त्रालयका सचिव धनबहादुर तामाङले जानकारी दिनुभयो ।
यस्तै अरनिको राजमार्गको बाह्रबिसे–तातोपानी खण्डको मर्मत सम्भार छिटो सम्पन्न गरी कोदारी नाका खुलाउने सम्बन्धमा पनि उहाँहरुबीच छलफल भएको थियो । चीन सरकारको सहयोगमा सञ्चालित चक्रपथ विस्तार आयोजना गत वर्षको भूकम्प र भारतको नाकाबन्दीले ढिला भएको थियो ।
भूकम्पपछि क्षति पुगेको अरनिको राजमार्गको बाह्रबिसे–तातोपानी खण्ड चिनियाँ सरकारकै सहयोगमा मर्मत सम्भार भइरहेको छ । हाल सो मार्ग सञ्चालनमा आउन सकेको छैन ।
यस्तै राजदूत होङले मन्त्री लेखकलाई आगामी मे महिनामा चीनमा हुने पूर्वाधार सम्बन्धी सम्मेलनमा भाग लिन निमन्त्रणा समेत गर्नुभएको छ ।
