काठमाडौ १८ माघ ।
चितवनको दारेचोक–७ चुङ खोलास्थित पृथ्वी राजमार्गमा आज बिहान भएको सवारी दुर्घटनामा तीन जना घाइते भएका छन् ।
काठमाडौँबाट नारायणगढतर्फ जाँदै गरेको ना ६ ख ८१२७ नम्बरको ट्रक विपरित दिशाबाट आउदै गरेको ना ५ ख ८६६२ नम्बरको ट्रकसँग ठोक्किएर दुर्घटना भएको प्रहरीले जनाएको छ ।
आज बिहान करिब साढे ५ बजे भएको उक्त दुर्घटनामा दुवै ट्रकका चालक र सहचालक घाइते भएका छन् । प्रहरीका अनुसार ना ५ ख ८६६२ नम्बरका ट्रक चालक मकवानपुर भैसे गाविस–२ का ४० वर्षीय पशुपति थापाको अवस्था गम्भीर छ ।
यस्तै सोही ट्रकका सहचालक २२ वर्षीय विमल आलेमगर र अर्का ट्रकका चालक दोलखाका २८ वर्षीय राजु लामा पनि घाइते भएका छन् । उनीहरुलाई उपचारको लागि काठमाडौँ ल्याइएको छ ।
दुई ट्रक ठोक्किएपछि अवरुद्ध सडक एकतर्फी खुलाइएको प्रहरीले जनाएको छ । घटनास्थल मुग्लिनबाट १० किलोमिटर काठमाडौँतर्फ पर्दछ ।
