चितवन , १६ माघ ।
चितवनको दारेचोक गाविस–४ स्थित नाग्दी खोला नजिकैबाट आज बिहान एउटा ट्रक त्रिशूली नदीमा खस्दा एकजना बेपत्ता भएका छन् ।
आज बिहान करिब ५ बजेको समयमा चामल बोकेर वीरगन्जबाट काठमाडौँ आउदै गरेको ना ५ ख ५६५४ नंको ट्रक अनियन्त्रित भई त्रिशूली नदीमा खसको जिल्ला प्रहरी कार्यालय चितवनले जनाएको छ ।
ट्रक सडकबाट करिब ७० मिटर तल त्रिशूली नदीमा पुगेको प्रहरीले जनाएको छ ।
चालक धादिङ खयरघारीका २० वर्षीय रामशरण वाग्लेको घाइते अवस्थामा उद्धार गरिएको र ट्रकमा सवार एकजना बेपत्ता भएको खुल्न आएको प्रहरीले जनाएको छ ।
बेपत्ता हुनेको पहिचान नभएको जनाइएको छ । उनी लिफ्ट मागेर ट्रकमा चडेको खुल्न आएके प्रहरीले जनाएको छ ।
ट्रकमा अन्य मानिस कति थिए भन्ने नखुलेको र अहिले घटनास्थलमा प्रहरी परिचालन गरिएको छ ।
यसैबीच कुरिनटारमा आज बिहान अर्को ट्रक पल्टिँदा चालक सिन्धुपाल्चोकका २६ वर्षीय हरि बस्नेत र सहचालक सोही ठाउँका १८ वर्षीय नीरज भुजेल घाइते भएका छन् ।
वीरगन्जबाट काठमाडौँ आउदै गरेको ना६ख ४७२९ नंको मच्छड धुप बोकेको ट्रक चितवनको दारेचोक गाविस–३ कुरिनटारमा अनियन्त्रित भई ट्रक पल्टिएर २० फिट तल खसेको प्रहरीले जनाएको छ ।
दुवै घाइतेको अहिले भरतपुर मेडिकल कलेजमा उपचार भइरहेको छ ।
