बिर्तामोड, १६ माघ । आजदेखि सुरु भएको झापा गोल्डकपको उद्घाटन खेलमा आयोजक रमपम झापा ११ विजयी भएको छ । रमपमले भारतको शेर फुटवल क्लबलाई ५–० को फराकिलो गोलअन्तरले पराजित गरेको हो ।
झापा ११ का लागि सञ्जोग राईले खेल सुरु भएको चौथो मिनेटमै गोल गरेका थिए । यस्तै खेलको ३७औँ मिनेटमा बुद्ध चेम्जोङले दोस्रो गोल गरेका थिए । लगत्तै पुजन उपरकोटीले तेस्रो गोल गरे । यस्तै कप्तान कर्ण लिम्बूले चौथो तथा पिटर सेगुनले पाँचौँ गोल गरेका थिए । खेलको म्यान अफ द म्याच सञ्जोग राई घोषित भए । उनले म्याक्स हाउजिङ प्रालिका तर्फबाट रु सात हजार पुरस्कार प्राप्त गरे ।
नकआउट चरणमा खेलाइने उक्त प्रतियोगितामा आयोजक रमपम झापा ११, मनाङ मस्र्याङ्दी क्लब, नेपाल पुलिस क्लब, सशस्त्र प्रहरीको एपिएफ क्लब, नेपाली सेनाको त्रिभुवन आर्मी क्लब, न्युरोड टिम, हिमालयन शेर्पा क्लब, रुपन्देही ११ फुटबल क्लब, सुदूरपश्चिम फुटवल क्लब र भारतको शेर फुटबल क्लबको सहभागिता रहेको छ ।
आइतबार एनआरटी क्लब काठमाडौँ र नेपाल पुलिस क्लबबीच खेल हुनेछ । प्रतियोगिताको विजेताले रु सात लाख र उपविजेताले रु तीन लाख ५० हजारसहित ट्रफी पाउनेछन् ।
