पोखरा, १५ माघ । पोखरामा जारी १५ औं आहा रारा गोल्डकप फुटबल प्रतियोगिताको उपाधिका लागि आज लक्ष्मी हुन्डाई मनाङमस्र्याङ्दी र आयोजक सहारा क्लब भिड्दै छन् ।
तेस्रो पटक फाईनलमा पुगेको सहारा र द्धार पटकको विजेता मनाङबीच कडा प्रतिस्पर्धा हुने अपेक्षा गरिएको छ ।
यी दुई टोलीबीचको उपाधि भिडन्त पोखरा रगंगशालामा दिउँसो साढे २ बजे सुरु हुनेछ ।
सहारा र मनाङ पोखरामा सातौपटक आमने सामने हुन लागेका हुन् । जसमा चारपटक सहारा पराजित भएको छ ।
मनाङ सङ्कटा क्लबलाई १ – ० ले पराजित गर्दै फाईनलमा पुगेको हो भने सहराले नेपाली सेनालाई ट्राईब्रेकरमा ४ – ३ ले हराउर्दै मनाङसँगको भेट पक्का गरेको हो ।
गत माघ ४ गतेदेखि पोखरा रङ्गशालामा जारी प्रतियोगितामा अमेरिकाको एएनए युएसए फुटबल टिम, बङ्लादेशको फरासगन्ज एससी र भारतको युनाइटेड सिक्किम फुटबल क्लबसहित १२ टिमको सहभागिता थियो ।
विजेता टिमले रु पाँच लाख एक हजार एक र उपविजेता टिमले दुई लाख ५१ हजार एक, कप, मेडल र प्रमाणपत्र पाउने छन् ।
त्यस्तै सर्वोत्कृष्ट खेलाडीलाई एक थान स्कुटर, प्रतियोगिता अवधिभर टिकट काटी अवलोकन गर्ने दर्शकमध्ये एकजनालाई गोलाप्रथाद्वारा एक तोला सुनको सिक्का प्रदान गरिने छ ।
