चितवन, १४ माघ ।
चितवन राष्ट्रिय निकुञ्जको पूर्वी सेक्टर सौराहामा आज बिहान कोसीटप्पु वन्यजन्तु आरक्षबाट दुई वटा अर्ना पुर्याईएको छ ।
ती अर्नालाई वनमन्त्री शङ्कर भण्डारी र राष्ट्रिय निकुञ्ज तथा वन्यजन्तु संरक्षण विभागका महानिर्देशक मानबहादुर खड्कालगायतको उपस्थितिमा निकुञ्जको पदमपुर क्षेत्रमा आजै छोडिने कार्यक्रम रहेको छ ।
निकुञ्जको पुरानो पदमपुर क्षेत्रमा यी जनावरका लागि खुल्ला खोर (इन्क्लोजर) निर्माण सम्पन्न गरिएको छ भने त्यहाँसम्म पुग्ने सडक पनि मर्मत गरी तयार पारिएको छ ।
बाघले अर्नाको सिकार गर्ने भएकाले खुल्ला खोरमा राख्ने व्यवस्था गरिएको हो । चितवन राष्ट्रिय निकुञ्जमा पछिल्लो समय बाघको सङ्ख्या बढेकाले अर्ना बथानमा परिणत नभएसम्म खुल्ला खोरमै राख्ने तयारी गरिएको छ । बाघजस्ता मांसाहारी जनावरबाट बच्नका लागि प्रकृतिले अर्नालाई बथानमा बस्ने स्वभाव दिएको कँडेलले बताउनुभयो ।
कँडेलका अनुसार दुई हजार मिटर जाली लगाएर ३० हेक्टर क्षेत्रफलमा खोर निर्माण गरिएको छ ।
भुइँमा सोलिङ गरेर जालीलाई पिसिसीले च्यापेर ६ फिट अग्लो खोर बनाइएको उहाँले बताउनुभयो । खोरमा वरिपरि सोलार फेन्सिङ गरिएको छ । जसका कारण अन्य जनावर खोरभित्र पस्न सक्ने छैनन् ।
तीन वटा अर्ना ल्याउने तयारीस्वरुप तीन वटा खोर लगिएको भए पनि दुई वटा खोरमा मात्र अर्ना ल्याइएको हो । चितवनमा पाँच भालेसहित २० वटा अर्ना ल्याउने योजना छ ।
