काठमाडौं, माघ १३ । भारतले आफ्नो ६८ औं गणतन्त्र दिवसका अवसरमा आज नेपाललाई २० वटा एम्बुलेन्स र ४ वटा बस उपहार दिएको छ ।
गणतन्त्र दिवसका अवसरमा नेपालस्थित भारतीय राजदूतावासले आयोजना गरेको कार्यक्रममा भारत सरकारले नेपालका विभिन्न जिल्लाका अस्पताल, स्वास्थ्य चौकी र शैक्षिक संस्थालाई २० वटा एम्बुलेन्स र ४ वटा बस उपहार प्रदान गरेको छ ।
त्यसैगरी विभिन्न पुस्तकालयलाई पुस्तकसमेत प्रदान गरेको छ । कार्यक्रममा नेपालका लागि भारतीय राजदूत रणजीत रायले भारतको झण्डा फहराई भारतका राष्ट्रपति प्रणव मुखर्जीले गणतन्त्र दिवसका अवसरमा दिएको सन्देश पढेर सुनाउनु भएको थियो ।
भारतीय राष्ट्रपति मुखर्जीले दिएको सन्देशमा भारत र नेपालका जनताको आपसी मित्रता अझ बलियो हुने विश्वास व्यक्त गर्दै नेपालमा दीगो शान्ति, स्थायित्वमा जोड दिनुभएको छ ।
कार्यक्रममा भारतीय सेनाका स्वर्गिय भूपू सैनिकका श्रीमती तथा शारीरिक रुपले अशक्त भूपू सैनिकलाई आर्थिक सहयोगसमेत गरिएको थियो ।
भारतले हालसम्म नेपालका ७३ जिल्लाका विभिन्न संघसंस्थालाई ६ सय २ वटा एम्बुलेन्स, १ सय १८ वटा बस प्रदान गरिसकेको जनाएको छ ।
