सप्तरी , १२ माघ ।
सप्तरीमा एक किशोरीले आफूले प्रेम गरेका युवकसित छुटाएको भन्दै जिल्ला प्रहरी कार्यालय सप्तरी भित्रै विष सेवन गरी आत्महत्याको प्रयास गरेकी छन् ।
सप्तरीको शम्भुनाथ नगरपालिका–१० की १७ वर्षीय ती किशोरीले आफ्नो लामो समयदेखिको प्रेम सम्बन्ध छुटाउन लागेको भन्दै विष सेवन गरेपछि गम्भिर उनको बीपी कोइराला स्वास्थ्य विज्ञान प्रतिष्ठान धरानमा उपचार भईरहेको छ ।
राजविराजस्थित गजेन्द्रनारायण सिंह सगरमाथा अञ्चल असपतालमा उपचार हुन नसकेपछि धरान लगिएको जिल्ला प्रहरी कार्यालयका निरिक्षक विजय श्रेष्ठले जानकारी दिनुभयो ।
लामो समयदेखि प्रेम सम्बन्ध रहेका स्थानिय १८ वर्षीय युवकसित एकसाता अघि भागेपछि खोजी गरि परिवारले सोमबार राजधानीबाट उनलाई राजविराज लगेका थिए ।
मंगलबार जिल्ला प्रहरी कार्यालय सप्तरीमा दुवैका अभिभावकलाई राखेर छलफल गरी उमेर नपुगेकाले दुवैलाई अभिभावकको जिम्मा लगाउने बितिकै किशोरीले पिसाब लागेको भन्दै प्रहरी कार्यालयको शौचालयमा गएर नाम खुल्न नसकेको विष सेवन गरेकी थिइन् । उक्त विष उनले प्रहरी कार्यालय प्रवेश गर्दा सँगै ल्याएको प्रहरीले जनाएको छ ।
