काठमाडौ ११ माघ ।
अमेरिकी राष्ट्रपति डोनाल्ड ट्रम्पले आफ्नो कार्यकाल सम्हाले लगत्तै सुरक्षित गर्भपतन गराउने र त्यससम्वन्धी सूचना दिने गैरसरकारी संस्थाहरुलाई दिने सहयोगमाथि प्रतिवन्ध लगाउनु भएको छ ।
राष्ट्रपतिको पदभार सम्हालेको पहिलो दिन नै टम्पले गैरसरकारी संस्थाहरुलाई दिने सहयोग प्रतिबन्ध लगाएपछि यसको प्रत्यक्ष असर नेपालमाथि समेत पर्ने देखिएको छ ।
स्वास्थ्य क्षेत्रमा अमेरिका विश्वकै ठूलो दातृ निकाय हो । उसले अमेरिकी अन्तर्राष्ट्रिय सहयोग नियोग यूएस एआईडी मार्फत मात्र नेपाल लगायत अन्य देशहरुमा ३ अर्ब डलर खर्च गर्दै आएको थियो ।
राष्ट्रपति ट्रम्पको यो आदेशले सुरक्षित गर्भपतनका लागि क्रियाशील नेपाल परिवार नियोजन संघ पनि प्रभावित हुने भएको छ ।
यो निर्णयले सुरक्षित गर्भपतन सम्वन्धी कार्यका लागि आइरहेको १ करोड डलर सहायता कटौती हुने अन्तर्राष्ट्रिय परिवार नियोजन महासंघले जनाएको छ ।
गर्भपतनको विरोध गर्नु रिपब्लिकन पार्टीको घोषित नीति नै हो । सन् १९८५ बाट सुरु भएको यो कार्यक्रममाथि हरेक रिपब्लिकन राष्ट्रपतिले प्रतिवन्ध लगाउँदै आएका छन् ।
जर्ज डब्लू बुसले लगाएको यस्तै प्रतिवन्धलाई डेमोक्रेटिक पार्टीका राष्ट्रपति बाराक ओबामाले सन् २००९ मा हटाउनु भएको थियो । अहिले ट्रम्पले आफ्नो पहिलो कार्यकारी आदेश मध्ये एक यही विषयमा जारी गर्नुभएको हो ।
