काठमाडौ ११ माघ ।
भारतले प्रतिबन्धित नोट साट्ने वा नसाट्ने बारे ठोस निर्णय दिन नसक्दा नेपालमा भएका भारतीय नोट सटही प्रक्रिया अन्योलमा परेको छ ।
नोट सटहीबारे भारतमै गएर छलफल गरेपनि भारतीय पक्षले प्रतिबन्धित नोट साटिदिने बारेमा खासै चासो नदेखाएको नेपाल राष्ट्र बैंकका प्रवक्ता नारायण पौडेलले जानकारी दिनुभयो ।
कालोधन व्यवस्थापनका लागि भनदै भारत सरकारले पाँच सय र एक हजार दरका नोटमा प्रतिबन्ध लगाएको २ महिना बितिसकदा पनि नेपालमा भएको नोट सटहीबारे भारतले ठोस निर्णय गरेको छैन ।
प्रतिबन्धित नोट कहिले र कसरी सटही गर्ने बारे कुनै आधिकारिक जानकारी नदिँदा अन्यौल झनै बढ्दै गएको राष्ट्र बैंकले जनाएको छ ।
भारतीय नोटमा लागेको प्रतिबन्धले सीमावर्ती क्षेत्रका नेपाली नागरिक बढी प्रभावित भएका छन् । सामान्य घर खर्चदेखि उपचार सेवा समेत प्रभावित हुने गरेको उनीहरुले बताएका छन् ।
पाँच सय र एक हजारको भारतीय नोटमा प्रतिबन्ध लागेपछि सीमा क्षेत्रमा नोट साटिदिने बहानामा उनीहरु ठगीमा समेत पर्ने गरेका छन् ।
