काठमाडौँ, १० माघ । पाँच प्रकारका घटना दर्तालाई विद्युतीय प्रविधिमा लैजान नेपालले विश्व बैंकसँग १५ करोड अमेरिकी डलर ऋण सम्झौतामा हस्ताक्षर गरेको छ ।
आज अर्थमन्त्रालयमा करिब रु १६ अर्ब ३७ करोड ऋण सहायता प्रदान गर्ने सम्बन्धी सम्झौतापत्रमा मन्त्रालयका सचिव डा शान्तराज सुवेदी र विश्व बैंकका देशीय प्रबन्धक ताकुया कामाताले हस्ताक्षर गर्नुभयो ।
सम्झौतामा हस्ताक्षर गर्दै सचिव सुवेदीले यसले सामाजिक सुरक्षा कार्यक्रमलाई व्यवस्थित बनाउन सहयोग गर्ने बताउनु भयो ।
बैंकका देशीय प्रवन्धक कामाताले आयोजना कार्यान्वयन भएपछि सामाजिक सुरक्षाका कार्यक्रमको विद्युतीय भुक्तानी गर्दा काम छिटो र कम जनशक्तिले गर्न सकिने बताउनजु भयो ।
तीन महिनापछि सबै तयारी पूरा गरी स्थानीय निकायमा विद्युतीय प्रविधिबाट घटना दर्ताका लागि पूर्वाधार निर्माण र जनशक्ति व्यवस्थापनको काम सुरु हुने विभागले जनाएको छ । पाँच वर्षमा सबै स्थानीय निकायमा पूर्वाधार निर्माण र जनशक्ति व्यवस्थापनको काम पूरा गर्ने विभागको लक्ष्य छ ।
