काठमाडौ १० माघ ।
गोरु काटेर खाएको आरोपमा पर्वतको चित्रे गाविसका दुई जनालाई पक्राउ गरी पुर्पक्षका लागि चुनामा राखेको छ । पर्वतका चित्रे ५ का रामबहादुर आइते र चित्रे ९ का मिल्के दर्जीलाई पर्वत जिल्ला अदालतले पुर्पक्षका लागि थुनामा राख्न आदेश दिएको छ ।
गोरु काटेर खाएको भन्दै जिल्ला प्रहरी कार्यालय पर्वतले आइते र दर्जीलाई पक्राउ गरी पर्वत जिल्ला अदालतमा मुद्दा दायर गरेको थियो ।
मुद्दाका आरोपितलाई थप अनुसन्धानका लागि पर्वत जिल्ला अदालतका न्यायाधीश मोहनराज भट्टराइको एकल इजलासले मुद्दा दायर भएकै दिन ७ माघमा दुवै जनालाई पुर्पक्षका लागि थुनामा राख्ने आदेश दिएको हो ।
आरोपित दुवै जनाले पुस १८ गते गोरु काटेर खाएको कसुर पेश भएको थियो । उनीहरु दुवै जनालाई मुलुकी ऐनको चौपाय महलको १ नम्बर विपरित कार्य गरेको भन्दै कार्बाहीको माग दावी गरिएको छ ।
चौपाय महलको ११ नम्बरमा आरोपितलाई माग बम्मोजिमको कसुर ठहरेमा १२ वर्ष कैद सजाय हुने कानुनी व्यवस्था छ ।
