काठमाडौ ७ माघ ।
बेइजिङस्थित नेपाली दूतावासले नेपालमा चिनीयाँ लगानी भित्र्याउन पहल सुरु गरेको छ । नेपालमा चिनियाँ लगाानीकर्ताहरुलाई आकर्षित गर्ने उदेश्यले दुतावासले पहिलो पटक चिनीयाँ लगानीकर्ताहरुसँग अन्तरक्रिया गरेको छ ।
दूतावासको सभाकक्षमा बिहिबार सम्पन्न भेलामा विभिन्न १२ वटा चिनियाँ लगानी कम्पनीका २२ प्रतिनिधि सहभागी रहेका थिए । सो क्रममा चीनका लागि नेपाली राजदुत लिलामणि पौडेलले नेपालमा चिनीयाँ लगानीको सम्भावना, लगानी सुरक्षा लगायतका विषयमा जानकारी गराउनु भएको थियो ।
आगामी फागुनमा नेपालमा हुने लगानी सम्मेलनमा सहभागी हुनका लागि चिनियाँ लगाानीकर्ताहरुलाई आह्वान गर्दै चीन स्वशासित तिब्बतको सीमा क्षेत्रमा सडक सन्जालबाट सम्पर्क विस्तार भइरहेकाले चिनियाँ प्रविधि र पुँजी नेपालमा लगानीका लागि उत्तम विकल्प रहेको पौडेलले बताउनु भयो ।
सो क्रममा दुतावासका काउनिसलर हरिश्चन्द्र घिमिरेले नेपालको पर्यटन सम्बन्धी श्रव्य दृश्य सामग्री प्रस्तुत गर्दै चिनियाँ लगानीकर्ताका लागि नेपाली पर्यटन सुनौलो अवसर रहेको बताउनु भयो ।
