काठमाडौ ५ माघ ।
संसद्को महाभियोग सिफारिस समितिले निलम्बित अख्तियार प्रमुख लोकमान सिंह कार्कीले अख्तियार प्रमुखमा रहँदा गरेको काम कारवाही छानबिनका लागि ३ सदस्यीय उपसमिति गठन गरेको छ ।
सिंहदरबारस्थित समिति कार्यलयमा बसेको आज बसेको बैठकले काकीले अख्तियार प्रमुख रहेका समय गरेका काम कारबाहीबारे छानबिन गर्ने निर्णय गरेको हो । छानबिनका लागि उपसमितिलाई १५ दिनको समय दिइएको छ ।
उपसमितिमा रामनारायण विँडारी, रेवतीरमण भण्डारी र दीपकप्रसाद कुइँकेल रहेका छन् । अख्तियार दुरूपयोग अनुसन्धान आयोगका प्रमुखका रूपमा काम गर्दा कार्कीले पदीय आचरण विपरीत तथा संविधानको भावनाका विरुद्धमा काम गरेको भन्दै महाभियोगको प्रस्ताव दर्ता भएको थियो ।
महाअभियोग प्रस्तावमा सांसदहरुले किटानी गरिएका आरोपहरुबारे उपसमितिले छानबिन गर्ने समितिका सदस्य भण्डारीले जानकारी दिनुभयो ।
यसअघि कानुनी क्षेत्रका उच्च सरकारी अधिकारीसँग छलफल समितिले सर्वोच्चले अयोग्य ठहर गरेपछि कार्की पदमुक्त भइसकेको भन्दै अब कार्कीले गरेका अनियमिताबारे मात्र छानविन गर्ने निष्कर्ष निकालेको छ ।
लामो छलफलपछि सदनले प्रस्ताव अघि बढाउन महाभियोग सिफारिस समितिमा पठाएको थियो । समितिमा प्रस्ताव पुगेकै दिन सर्वाेच्च अदालतले कार्की प्रमुख आयुक्त हुन योग्यता नपुगेको निर्णय सुनाएको थियो ।
