काठमाडौ २ माघ ।
व्यवस्थापिका संसद अन्तरगतको लेखा समितिले एनसेलको शेयर खरिद–बिक्री प्रत्रियामा भएको लाभमा लाग्ने पूँजीगत लाभकर तीन महिना भित्र असुल्न सरकारलाई निर्देशन दिएको छ ।
आज बसेको समितिको बैठकले अर्थसमितिलाई यस्तो निर्देशन दिएको हो । बैठकमा सांसदले अर्थसचिव शान्तराज सुवेदी र आन्तरिक राजस्व कार्यालयका महानिर्देशक चुडामणि शर्मालाई यसबारे प्रश्न गर्नुभएको थियो ।
अर्थसचिव सुवेदीले एनसेलको लाभकर उठाउन कार्यतालिका बनाएर काम भइरहेको र केही महिनाभित्र कर निर्धारण गरेर उठाउने गरी काम गरिरहेको जानकारी दिनुभयो ।
बैठकमा सांसदले एनसेलले तिर्नुपर्ने कर पूर्ण रुपमा नतिरेसम्म फोरजी सञ्चालन प्रक्रिया रोक्न पनि माग गरेका छन् । यस विषयमा अर्थ समितिमा पनि छलफल हुने भएको छ ।
संसदको अर्थ समितिले यसअघि नै एनसेलको पूँजीवृद्धि लगायत नयाँ योजना रोक्न निर्देशन दिएको छ भने समितिकै निर्देशनका कारण एनसेललाई फोरजी सेवा संचालन गर्न दूरसञ्चार प्राधिकरणले अनुमति दिएको छैन ।
