काठमाडौ २९ पौष ।
ट्राफिक व्यवस्थापनलाई थप प्रभावकारी बनाउन महानगरीय ट्राफिक प्रहरी महाशाखाले काठमाडौं उपत्यकामा ड्रोन क्यामेरा प्रयोग गर्ने भएको छ ।
अब जाम हुने उपत्यकाका मुख्य सडक र चोकहरुमा ट्राफिक प्रहरीले ड्रोन क्यामेराबाट सडकको अवस्थाको प्रत्यक्ष जानकारी लिने जनाइएको छ ।
महानगरीय ट्राफिक प्रहरी महाशाखाको कार्यालय रामशाहपथमा आज आयोजित एक कार्यक्रममा एनएमबी बैंकका प्रबन्ध निर्देशक उपेन्द्र पौडेलले ३ लाख ५० हजार बराबरको आधुनिक ‘प्यान्टम फोर प्रो’ मोडलको ड्रोन महाशाखालाई हस्तान्तरण गर्नु भयो ।
उपत्यकाभित्रको बढ्दो ट्राफिक जाम र ट्राफिक उल्लंघनका घटनालाई मध्यनजर गर्दै महाशाखालाई ड्रोन हस्तान्तरण गरेको पौडेलले बताउनु भयो ।
ट्राफिक प्रहरी महाशाखा प्रमुख प्रकाश अर्यालले ट्राफिक व्यपस्थापनमा एकपछि अर्को प्रविधि भित्र्याउँदै आएकोले उपत्यकाको ट्राफिक व्यवस्थापन पनि सहजतर्फ उन्मुख भएको बताउनु भयो ।
