काठमाडौं , पुस २९ । सत्तारुढ दलका सांसदले स्थानीय तहको निर्वाचन मिति यथाशीघ्र घोषणा गर्न सरकारसँग माग गरेका छन् ।
आज बसेको व्यावस्थापिका संसदको बैठकमा बोल्दै कांग्रेसका सांसद दिपकप्रसाद कुइँकेल लामो समयदेखि स्थानीय निर्वाचन नहुँदा समस्या भएकोले यथाशीघ्र चुनाव गर्नुपर्नेमा जोड दिनुभयो । उहाँले स्थानीय तह पुनर्संचना आयोगले सरकारलाई बुझाएको प्रतिवेदनलाई जनस्तरमा पुर्याउनु पर्ने बताउनु भयो । सो प्रतिवेदनबारे जनप्रतिनिधिलाई समेत जानकारी नदिएको भन्दै उहाँले असन्तुष्टि पनि जनाउनु भयो ।
सांसद सूर्यबाला राईले विपक्षी दलहरुले सरकारले निर्वाचन गर्न नचाहेको आरोप लगाएको उल्लेख गर्दै त्यसलाई चिर्न निर्वाचन मिति घोषणा हुनुपर्ने बताउनु भयो । यस्तै आजको बैठकमा बोल्दै नेपाल मजदुर किसान पार्टीका सांसद प्रेम सुवालले देशमा विदेशी हस्तक्षेप रोक्न संविधानमा नै प्रावधान राख्न माग गर्नुभएको छ ।
सांसद सुवालले नेपालमा बारम्बार भारत लगायत देशले हस्तक्षेप गरिरहेको भन्दै त्यसलाई रोक्न संविधान संशोधनमार्फत् प्रावधान राख्नुपर्ने माग गर्नुभयो । यस्तै उहाले भूकम्पपछिको पुननिर्माण, पुनर्स्थापना ठप्प भएको भन्दै पिडितलाई सरकारले नै घर बनाईदिन पर्ने बताउनु भयो ।
