काठमाडौं, पुस २८।
काठमाडौं उपत्यकामा हुस्सु लागेपछि त्रिभुवन अन्तर्रा्ष्ट्रिय विमानस्थलबाट हुने उडान प्रभावित भएको छ । भिजिविलिटि कम भएपछि अहिले कुनै पनि उडान नभएको विमानस्थल कार्यालयले जनाएको छ ।
अहिले विमानस्थलको भिजिविलिटि एक हजार मिटरमा झरेको मौसमविद् समिर श्रेष्ठले जानकारी दिनुभयो । ९ बजेपछि भिजिविलिटि बढ्ने र त्यस पछि भने सबै उडान नियमित हुने मौसमविद् श्रेष्ठले जानकारी दिनु भयो ।
आज पहाडी क्षेत्रको मौसम दिनभरि नै आशिंक बदली हुने उहाँले बताउनुभयो । मौसमविद् श्रेष्ठका अनुसार मध्य र पूर्वी नेपालको मौसम सफा हुनेछ ।
तर शनिबार पश्चिमी वायु सक्रिय हुने देखिएकाले देशका धेरै ठाउँमा पानी पर्ने संभावना छ । गएको २४ घण्टामा लुम्लेमा १ दशमलव ६ मिलिमिटर पानी परेको जल तथा मौसम पूर्वानुमान महाशाखाले जनाएको छ ।
यस्तै गएको २४ घण्टामा काठमाडौं उपत्यकासहित देशका धेरै ठाउँमा यो वर्षकै कम न्यूनतम तापक्रम मापन गरिएको छ । महाशाखाका अनुसार गएको २४ घण्टामा काठमाडौंको तापक्रम २ दशमलव ४ डिग्री सेल्सियसमा झरेको थियो ।
