काठमाडौ २७ पौष ।
बाली संरक्षण निर्देशनालयले उपत्यकाका विभिन्न तरकारी बजारमा विषादी परीक्षण सुरु गरेको छ । किसानले विषादी हालेको तरकारी कालीमाटी बाहेक अन्य बजारमा बिक्री गर्न थालेपछि विषादी परीक्षण सुरु गरेको हो ।
उपत्यकामा तरकारी र फलफूल भित्रने नाकालाई लक्षित गरेर परीक्षण थालिएको बाली संरक्षण निर्देशनालयका कार्यक्रम निर्देशक डिल्लीराम शर्माले जानकारी दिनुभयो ।
थानकोट, फर्पिङ, बालाजु, जगातीलगायत उपत्यकामा तरकारी भित्रने नाका लक्षित गरेर तरकारी तथा फलफूलमा विषादीको मात्रा परीक्षण थालेको शर्माको भनाइ छ ।
कालीमाटी बजारमा मात्रै विषादीको परीक्षण हुँदा अन्य स्थानमा विषादी भएका तरकारी फलफूल बिक्री हुनसक्ने देखिएपछि अन्य स्थानमा पनि विषादी परिक्षण सुरु गरिएको निर्देशनालयले जनाएको छ ।
कालीमाटीस्थित तरकारी तथा फलफूल बजारमा दुई वर्षदेखि विषादी अवशेष द्रूत विश्लेषण इकाइको स्थापना गरेर नियमित परीक्षण गरिँदै आएको छ ।
नेपालमा अत्यन्त घातक मानिने १६ वटा विषादी प्रयोग गर्न प्रतिबन्ध लगाएको निर्देशनालयले जनाएको छ ।
