काठमान्डौ पुस २७ ।
साउदी अरबमा मृत्यु भएका श्रीमानको शवको पर्खाइमा रहेकी रोल्पाकी एक महिलाको मृत्यु भएको छ । डेढ वर्षअघि मृत्यु भएको श्रीमानको शव को पर्खामा बसेकी रोल्पा लिवाङ–९ एक महिलाको श्रीमानको लास हेर्न नपाउँदै मृत्यु भएको हो ।
वैदेशिक रोजगारीको सिलसिलामा साउदी पुगेका श्रीमान खुमबहादुर गुरुङको मृत्युपश्चात् तनावमा रहेकी कमला गुरुङको गत सोमबार दिउँसो २ बजे आफ्नै घरमा रहस्यमय तरिकाले मृत्यु भएको हो । यद्यपी उनको हृदयाघातका कारण मृत्यु भएको हुनसक्ने अनुमान गरिएको छ ।
मृतककी सासूले बुहारी एक्कासी बेहोस भई लडे पछि छिमेकीलाई खबर गरेकी थिइन् । बेहोस भई लडेकी गुरुङको छिमेकीले खुट्टा मालिस गर्दै गर्दा मृत्यु भएको छिमेकीले बताएका छन् ।
मृत्यु भएको खबर पाउने बित्तिकै जिल्ला प्रहरी कार्यालय, रोल्पाको एक टोली घटनास्थलतर्फ गएको जिल्ला प्रहरी कार्यालय रोल्पाले जनाएको छ । घटनाको थप अनुसन्धानसमेत भइरहेको प्रहरीले जानकारी दिएको छ ।
साउदी अरबमा कम्पनीकै गाडीले ठक्कर दिँदा मृत्यु भएको कमलाको श्रीमानको शव लामो समय भइसक्दा समेत नेपाल आउन सकेको छैन ।
