काठमान्डौ पुस २७ ।
आज पुस २७ गते नेपाल एकीकरण गर्ने तत्कालीन राजा पृथ्वीनारायण शाहको २ सय ९५ औ जन्मजयन्ती मुलुकभर विभिन्न कार्यक्रम गरी मनाइदै छ ।
गोरखा राज्यका तत्कालिन राजा पृथ्वी नाराण्यण शाहले आफ्नो कार्यकालमा काठमाडौ उपत्यका सहित अन्य बाइसे चौविसे राज्यलाई मिलाएर आधुनिक नेपाल निर्माण गर्नुभएको थियो ।
विक्रम सम्वत् १७७९ पौष २७ मा पिता नरभूपाल शाह र माता कौशल्यवती देवीका प्रथम पुत्रको रुपमा पृथ्वी नारायण शाहको जन्म भएको थियो ।
पृथ्वी जयन्तीका अवसरमा विभिन्न राजनीतिक दल तथा निजी क्षेत्रको पहलमा आज विभिन्न कार्यक्रमको आयोजना गरिएको छ ।
वि सं २००७ सालपछि पृथ्वी जयन्तीलाई राष्ट्रिय एकता दिवसका रुपमा मनाउदै सार्वजनिक बिदा दिँदै आएकोमा लोकतन्त्रको स्थापनापछि भने सरकारले राष्ट्रिय स्तरबाट यो दिवसलाई खारेज गरेको छ ।
यद्यपी नागरिक समाज तथा केही दलले भने पृथ्वी जयन्तीलाई राष्ट्रिय एकता दिवसका रुपमा मनाउदै आएका छन् । पछिल्लो समय पुस २७ लाई राष्ट्रिय एकता दिवसको रुपमा मनाउनुपर्ने आवाज उठे पनि राजनितिक मुद्धा जोडिएको भन्दै सरकारले यस विषयमा कुनै निर्णय लिएको छैन ।
यसैवीच कमल थापा नेतृत्वको राप्रपाले पृथ्वी जयन्तीको अवसरमा आज दिउँसो भृकुटीमण्डपमा चियापान समारोहको आयोजना गरेको छ ।
दिउँसो १ बजेदेखि ४ बजेसम्मका लागि आयोजना गरिएको चियापानमा प्रधानमन्त्री पुष्पकमल दाहाल देखि प्रमुख दलका शीर्ष नेताहरुलाई समेत बोलाइएको राप्रपाले जनाएको छ ।
राप्रपाले प्रत्येक वर्ष पृथ्वीजयन्तीको अवसरमा चियापान समारोहको आयोजना गर्दै आएको छ ।
