चितवन, २५ पुस । प्रधानमन्त्री पुष्पकमल दाहालले आउँदो वैशाखसम्ममा स्थानीय तहको निर्वाचन गर्ने गरी काम अगाडि बढेको बताउनुभएको छ ।
चितवनको राप्ती नगरपालिका–९ वीरेन्द्रनगरमा निर्मित सहिद स्मृति वाटिका अनावरण तथा समुद्घाटन समारोहलाई सम्बोधन गर्दै उहाँले निर्वाचन गर्ने विषयमा दलहरुको बीचको अन्योलता पनि हटिसकेको बताउनुभयो ।
संविधान संशोधनका विषयमा भने राजनीतिक दलका बीचमा वातावरण बनिनसकेको भन्दै उहाँले तर पनि संविधान घोषणाको समयमा तीन दलका बीचमा संविधान संशोधन गर्ने विषयमा सहमति गरिएको बताउनुभयो ।
संविधानमा उल्लेख भएका विषयलाई कार्यान्वयन गर्न सरकार प्रतिबद्ध रहेको भन्दै उहाँले सहकार्य गरेर अघि बढ्नुको विकल्प नरहेको बताउनुभयो ।
चितवनको विकासको गति तीव्र रुपमा अगाडि बढाउन आफू लागेको भन्दै उहाँले छिट्टै विशेष प्याकेजको घोषणा गर्ने पनि बताउनुभएको छ ।
