काकाठमान्डौ पुस २५।
नेपाली कांग्रेसको भातृ संगठन तरुण दलले पक्राउ परेका आफना कार्यकर्ता रिहाइको माग गर्दै आज पनि बाँके जिल्ला बन्द गरेको छ ।
युवा संघ केन्द्रीय सदस्य सन्तोष बुढाथोकीमाथि भएको आक्रमणको योजनाकारको आरोपमा प्रहरीले तरुण दल बाँके क्षेत्र नम्बर १ का अध्यक्ष दिग्वीजय जंग राणालाई पक्राउ गरेको विरोधमा तरुण दलले आज पनि बाँके जिल्ला बन्दको आहृवान गरेको हो ।
निर्दाेष राणालाई प्रहरीले अनाहकमा पक्राउ गरेको भन्दै तरुण दलले राणालाई तत्काल रिहाई नगरे आफूहरु कडा आन्दोलनमा उत्रने जनाएको छ ।
हिजो र आजको बन्दका कारण बाँकेका नागरिकको दैनिकी प्रभावित भएको छ । बन्दका कारण कोहलपुर लगायतका क्षेत्रमा बजार, यातायात, कलकारखाना सबै ठप्प छन् ।
यद्यपी शिक्षण संस्था, प्रेस, कुटनीतिक नियोग, एम्बुलेन्स, दमकल, मानव अधिकारकर्मी लगायतलाई बन्दमा छुट दिइएको बताइएको छ ।
गत पुस १४ गते कोहलपुरमा खुकुरी प्रहार भएका बुढाथोकीको हाल भारतको लखनउमा उपचार भइरहेको छ । बुढाथोकीमाथि खुकुरी प्रहार गर्ने लक्ष्मण मल्ल सहित १२ जनालाई पक्राउ गरिएको ईलाका प्रहरी कार्यालय कोहलपुरले जनाएको छ ।
