काठमान्डौ पुस २४ ।
लामो समयको अवरोधको बाबजुद पनि आज व्यवस्थापिका संसदको बैठक बस्दै छ । बैठक नयाँ बानेश्वर स्थित संसद भवनमा दिउसो १ बजेका लागि बोलाइएको छ ।
गत पुस १९ गते बसेको कार्यव्यवस्था परामर्श समितिको बैठकमा सर्वाेच्चको आदेश पछि प्रमुख दलका नेताहरुले सहमति जुटाउन समय मागे पछि सभामुख ओनसरी घर्ती मगरले आज सम्मका लागि बैठक स्थगित गर्नु भएको थियो ।
तर पाँच दिनको समयावधिमा गतिरोध खुलाउने सम्बन्धमा प्रमुख दलका नेताहरुसँग सरकारले कुनै औपचारिक छलफल भने गरेको छैन ।
आजको संसद बैठकमा सरकारले संविधान संशोधन विधेय टेवुल गर्ने तयारी गरेको छ । तर प्रमुख प्रतिपक्षी दल नेकपा एमालेले सरकारले संशोधन विधेयक फिर्ता नलिए आजको संसद बैैठक पनि अवरोध गर्ने जनाएको छ ।
यस अघि सत्तारुढ दलले आजको संसद बैठक सुरु हुनु अघि नै प्रमुख प्रतिपक्षी एमालेसँग गतिरोध हटाउन सहमतिको प्रयास स्वरुप छलफल गर्ने बताइएको छ ।
गत मंसिर १६ गतेदेखि एमाले सहित ९ दलले संबिधान संसोधन प्रस्तावको बिरोध गदै संसद बैठक अवरोध गर्दा संविधान संशोधन विधेयक, निर्वाचन सम्बन्धी विधेयक र निलम्बित अख्तियार प्रमुख लोकमानसिंह कार्की बिरुद्ध परेको महाअभियोग प्रस्ताव समेत अलपत्र परेको छ ।
