एजेन्सी,पुस २४।
स्पेनिस ला लिगाको गएराति भएको खेलमा सेभिल्ला विजयी भएको छ । सेभिल्लाले रियल सोसिडाडलाई ४–० गोल अन्तरले पराजित गरेको हो ।
सेभिल्लाको जितमा विस्साम बेन यड्डरले ह्याट्रिक गरे । यस्तै साराबिएले एक गोल गरेका हुन् । जित सँगै सेभिल्ला बार्सिलोनालाई पछि पार्दै ला लिगाको दोस्रो स्थानमा उक्लिएको छ ।
यड्डरले २५, २९ र ८३ औं मिनेटमा गोल गर्दै ह्याट्रिक पूरा गरेका हुन् । उनले ह्याट्रिक पूरा गर्नु अघि ७३ औं मिनेटमा साराबिएले एक गोल गरेका थिए ।
जितपछि दोस्रो स्थानमा उक्लिएको सेभिल्लाको १७ खेलबाट ३६ अंक भएको छ । एक खेल कम खेलेको बार्सिलोनाको ३४ अंक छ ।
यस्तै गएराति नै भएको खेलमा एथ्लेटिको मड्रिडले एइबरलाई २–० ले पराजित गरेको छ । एथ्लेटिकको जितमा साउल निगुएज र एन्टोनी ग्रिजम्यानले गोल गरे ।
जितपछि चौथो स्थानको एथ्लेटिकको १७ खेलबाट ३१ अंक भएको छ । अर्को खेलमा लास पालमसले स्पोर्टिङ गिजोनलाई १–० ले हराएको छ ।
