रौतहट, २३ पुस । ऊर्जामन्त्री जनार्दन शर्माले विखण्डनकारी राष्ट्रवादले कसैको हित नगर्ने भएकाले सहमतीमा आउन प्रतिपक्षी दललाई आग्रह गर्नुभएको छ ।
प्रेस सेन्टर नेपाल रौतहट शाखाले आज आयोजना गरेको पत्रकार सम्मेलनमा बोल्दै उहाँले संसद्लाई बन्धक बनाएर प्रतिपक्षीहरुले निर्वाचनलाई पछाडि धकेल्न खोजेको होरोप लगाउनु भयो ।
संविधानको सर्वस्वीकार्यता बढाउन खोज्दा सदन नै अबरोध गरी निर्वाचनको मात्रै कुरा गर्दा प्रतिपक्षीले निर्वाचन नचाहेको आशङ्का उत्पन्न भइरहेको उहाँको भनाई छ ।
मन्त्री शर्माले संबिधान संसोधन मार्फत मधेसी, आदिवासी, जनजाति थारु र अल्पसङ्ख्यक समुदायलाई अधिकार दिन खोज्दा त्यसको बिरोध गर्नु एमालेको गैरराजनैतिक चरित्र भएको आरोप लगाउनु भयो ।
नेपालको सार्वभौमसत्ता, अखण्डता र गणतन्त्र बाहेकका विषयमा संविधान संशोधन गर्न सकिने भएकाले संविधान संशोधन हुनै सक्दैन भन्नु निरङ्कुश चरित्र भएको उहाँको टिप्पणी थियो ।
