काठमाडौ २२ पौष ।
स्पेनिस कोपा डेल रे अन्तर्गत गएराति सम्पन्न खेलमा बार्सिलोना एथ्लेटिको बिल्बाओसँग पराजित भएको छ । प्रतियोगिता अन्तरगत अन्तिम १६ को पहिलो लेगमा बार्सा बिल्बाओसँग २–१ गोल अन्तरले पराजित भएको हो ।
पछिल्लो चार वर्षमा बार्सिलोनामाथि बिल्बाओको यो पहिलो जित हो । एथ्लेटिको बिल्बाओका लागि आरिट्ज आडुरिज र इनाकी विलियम्सले गोल गरे ।
खेलको २५ औं मिनेटमा आडुरिज र २८ औं मिनेटमा विलियम्सले गोल गरेपछि पहिलो हाफमा घरेलु टोली एथ्लेटिको बिल्बाओले २–० को अग्रता लियो ।
५२ औं मिनेटमा बार्सिलोनाका लागि लियोनल मेस्सीले एक गोल फर्काए । ७४ औं मिनेटमा राउल गार्सिया तथा ८० औं मिनेटमा आन्द्रे टुरास्पे दोहोरो पहेँलो कार्ड खाँदै बाहिरिए ।
त्यसपछि ९ खेलाडीमा सीमित बिल्बाओसँग पनि बार्सिलोनाले फाइदा लिन सकेन । लुइस स्वारेज र नेइमारले पनि यो खेलमा गोल गर्न सकेनन् । दोस्रो लेग आगामी बुधबार बार्सिलोनाको घरेलु मैदान नाउ क्याम्पमा हुनेछ ।
