काठमााडै २१ पौष ।
सत्ता नेतृत्वकर्ता दल नेकपा माओवादी केन्द्रले संविधान संशोधन विधेयक सम्बन्धमा सर्वोच्च अदालतले गरेको फैसलाको स्वागत गर्दै प्रक्रियामा लैजाने निर्णय गरेको छ ।
संशोधन विधेयकका सम्बन्धमा सत्तापक्ष र प्रतिपक्षी दलले आ–आफ्नै ब्याख्या गरिरहेका समय माओवादी केन्द्रले सर्वोच्चको आदेशपछि विधेयक अघि बढाउने बाटो खुलेको निश्कर्ष निकालेको हो ।
राजधानीको लाजिम्पाटस्थित अध्यक्ष पुष्पकमल दाहालको निवासमा आज बसेको पार्टी हेडक्वाटर बैठकले विधेयक पारितका लागि दलीय छलफललाई तिब्र बनाउने निर्णय समेत गरेको नेता अग्नी सापकोटाले जानकारी दिनुभयो ।
बैठकले संशोधन विधेयकको बिरोधमा रहेको एमाले सहितका विपक्षी दलसँग छलफल गरी सबैलाई मान्य हुने गरी विधेयक अगाडि बढाउने बारे दलीय छलफल केन्द्रित गर्ने निर्णय समेत गरेको छ ।
बैठकमा पार्टी अध्यक्ष समेत रहनु भएका प्रधानमन्त्री पुष्पकमल दाहालले पछिल्लो राजनीतिक अवस्थाबारे जानकारी गराउनु भएको नेता अग्नी सापकोटाले जानकारी दिनुभयो ।
यस्तै माओवादी केन्द्रले संगठनात्मक कार्यबिधिमाथिको छलफल समेत सुरु गरेको छ । आगामी महाधिवेशनलाई लक्षित गरी समावेशी सिद्धान्तका आधारमा कार्यविधि तयार पार्ने जनाइएको छ ।
आन्तरिक निर्वाचनलाई निश्पक्ष र प्रतिस्पर्धात्मक ढंगबाट अगाडि बढाउने तयारी गरेको माओवादी केन्द्रले केन्द्रीय कार्यसमितिमा मनोनित सदस्यको कोटा समेत निर्धारण गर्ने गरी छलफल थालेको हो ।
