काठमाडौ २० पौष ।
त्रिभवन विश्वविद्यालयको सिनेट बैठकले स्ववियु निर्वाचनमा २८ वर्ष भन्दा माथिकाले उम्मेद्ववारी दिन नपाउने निर्णय गरेको छ । त्रिविको अडिटोरियम हलमा आज बसेको बैठकले स्वीयु निर्वाचनका लागि उमेर हदबन्दी तोक्ने निर्णय गरेको त्रिविका प्रवक्ता भोला प्रसाद ढकालले जानकारी दिनुभयो ।
गत असार २६ गते बसेको त्रिवि सभाले स्ववियु निर्वाचन आगामी फागुन १४ गते गर्ने निर्णय गरेको थियो । केहि विद्यार्थी संगठनले उम्मेद्वारको उमेर तोक्न नहुने माग गर्दै आएका थिए । यस्तै बैठकले शिक्षक कर्मचारी शिक्षा सम्बन्धि नियम, आर्थिक नियम, शैक्षिक संगठन सम्बन्धि नियम संशोधन गर्ने निर्णय समेत गरेको छ ।
सिनेट बैठकलाई सम्बोधन गर्दै प्रधानमन्त्री पुष्पकमल दाहालले राजनीतिक परिवर्तनलाई संस्थागत गर्न र संविधानको कार्यान्वयनका लागि त्रिविलाई केन्द्रीय विश्वविद्यालय सहित उत्कृष्ट केन्द्र बनाउन निर्देशन दिनुभयो ।
स्थानीय निर्वाचनको मिति तय भइसकेपछि त्यसलाई प्रतिकूल असर नगर्ने वातावरण बनाई स्ववियु निर्वाचन गराउन समेत उहाँले आग्रह गर्नुभएको छ ।
उच्च शिक्षालाई समयानुकुल बनाउन त्रिवि अग्रसर हुनुपर्ने भन्दै उहाँले प्रशासनिक र नीतिगत विषयमा आवश्यकताअनुसार सुधार गरी आफ्ना कार्य सञ्चालन गर्न, प्राज्ञिक संस्थामा अति राजनीतिकरण नगर्न, उचित व्यवस्थापन गर्नुपर्नेमा जोड दिनुभयो ।
