कावासोती, २० पुस । नेपाली काँग्रेसका महामन्त्री डा सशाङ्क कोइरालाले राजनीतिक स्थिरताका लागि वार्ता नै समस्याको समाधान भएको बताउनुभएको छ ।
नवलपरासीको गैँडाकोट नगरपालिकाको तेस्रो नगरपरिषद्को उद्घाटन समारोहमा बोल्दै उहाँले संविधान संशोधनको प्रस्तावबारेमा पुनः एक पटक दलले सोच्नुपर्ने बताउनुभयो ।
संविधान जारी गर्दा संविधानसभाका ९० प्रतिशत सभासद्ले सहमति जनाएका स्मरण गर्दै कोईरालाले अब कार्यान्वयनको समयमा पनि मिलेर जानु पर्ने बताउनु भयो ।जनताको भावनामा खेलवाड गर्नु नहुने उहाको भनाई छ ।
तीन तहको निर्वाचन गराउँदा मात्र संविधानको कार्यान्वयन हुने भएकाले चुनावमा केन्द्रित हुन आवश्यक भएको उहाँले औँल्याउनुभयो ।
नवलपरासी क्षेत्र नं १ को विकासका लागि गैँडाकोटदेखि कोटथर बुलिङटार हुँदै दलदले निस्कने चक्रपथ र गैँडाकोट नगरभित्रको चक्रपथ निर्माणमा लागि परेको समेत उहाँले बताउनुभयो ।
अत्याधिक दुर्घटना हुने भएकाले जिल्लामा एउटा राम्रो अस्पताल बनाउन समेत आवश्यक छ डा कोइरालाले भन्नुभयो– “यहाँ बिपी कोइरालाको नाउँमा अन्तर्राष्ट्रियस्तरको खेल मैदान बनाउने सोचमा छु ।”
उहाँले विकासका प्राथमिकताका लागि आवद्यिक योजना बनाएर सबै नगरपालिका र जिल्ला विकास समितिले काम गर्नुपर्ने विचार व्यक्त गर्नु भयो ।
