पौष १९, तेह्रथुम ।
प्रधानमन्त्री पुष्पकमल दाहाल ‘प्रचण्ड’ले तेह्रथुमको संक्रान्ति बजारका आगलागी पीडितहरुको पूनर्बासका लागि एक करोड रुपैयाँ उपलब्ध गराउने घोषणा गर्नुभएको छ ।
आज आगलागी भएको क्षेत्रको निरीक्षणपछि बोल्दै प्रधानमन्त्री दाहालले आफ्नो नेतृत्वमा रहेको केन्द्रीय दैवीप्रकोप कोषबाट संक्रान्ति बजारका अग्निपीडितका लागि एक करोड रुपैयाँ उपलब्ध गराउने घोषणा गर्नुभयो ।
यस्तै उहाले विशेष राहत प्याकेज स्वरुप संक्रान्ति बजारको पूनस्र्थापना र व्यवसाय सञ्चालनका लागि बिना धितो सहुलियत ऋण उपलब्ध गराउने, संक्रान्ति बजारमा नेपाल बैंक, कृषि विकास बैंकको शाखा कार्यालय स्थापना गर्ने, एम्बुलेन्सको व्यवस्था गर्ने प्रतिबद्धता जनाउनु भयो ।
प्रधानमन्त्रीले संक्रान्ति बजारमा नै दमकलको व्यवस्था , खानेपानी आयोजना सञ्चालन गर्ने पनि बताउनु भएको छ ।
संकटका बेला एकतावद्ध हुने नेपाली संस्कार भएको भन्दै प्रधानमन्त्रीले संविधान कार्यान्वयनको चरणमा सरकार रहेकोले चाडै संसदको गतिरोध हट्न जरुरी रहेकोमा पनि जोड दिनुभयो ।
राजनीतिक गतिरोध सम्वादकै माध्यमबाट समाधान गरी संविधान कार्यान्वयनका लागि निर्वाचनमा जाने पनि उहाले प्रतिबद्धता जनाउनु भयो ।
आगलागी भएको स्थानको निरिक्षण लगत्तै बसेको प्रधानमन्त्रीसहित जिल्लाका सांसद र जिल्ला दैवीप्रकोप उद्दार समितिका सदस्यहरुको बैठकले क्षतिग्रस्त ३२ घर र ५६ परिवारका लागि एक करोड रुपैयाँ उपलब्ध गराउने निर्णय पनि गरेको छ ।
गत पौष १ गते दिउँसो लागेको आगोबाट ३२ घर र ५६ परिवारमा क्षति भएको छ । आगलानीबाट १४ करोड ८ लाख क्षति भएको क्षति मूल्याङ्कन गरिएको प्रमूख जिल्ला अधिकारी मेनुका न्यौपानेले जानकारी दिनुभयो ।
