बागलुङ, १९ पुस ।
स्वर्गीय भक्तिलाल श्रेष्ठका परिवारले उहाँको स्मृतिका बागलुङ सदरमुकाममा रु. २२ लाखको लागतमा स्थत विद्यामन्दिर माध्यमिक विद्यालय भवन निर्माण गरेका छन् ।
विसं १९९७ मा स्थापना भएको विद्यालय भवन भूकम्पले क्षतिग्रस्त बनेपछि स्व श्रेष्ठका नातिहरु विराटकुमार, हरिशङ्कर र नारायणप्रसाद श्रेष्ठका परिवारले तीन कोठे पक्की भवन निर्माण गरेका हुन् ।
लाखौँ रुपैयाँ खर्चेर बनाइएको विद्यालय भवनमा रङ्रोगन मात्र गर्न बाँकी छ । कक्षा कोठा अभावमा पठनपाठन नै प्रभावित बनेपछि भवन निर्माण गरिएको श्रेष्ठका पनाति तीर्थप्रसादले बताउनुभयो ।
पूर्वजको स्मृति र सम्मानमा विद्यालय भवन बनाइएको उहाँको भनाइ छ । भक्तपुरबाट बागलुङ आउनुभएका भक्तिलालका सन्ततिहरु बागलुङलगायत देशका विभिन्न भागमा बसोबास गर्दै आएका छन् । जिजुको नाम र व्यक्तित्व अमर रहोस् भनेर सामाजिक सेवाको क्षेत्रमा योगदान गरिएको श्रेष्ठका खनाति श्रीजय श्रेष्ठले बताउनुभयो ।
श्रेष्ठ परिवारले सोही विद्यालयमा रु सात लाखको कोष खडा गरी हरिलक्ष्मी–नारायणप्रसाद उत्कृष्ट विद्यार्थी पुरस्कार पनि स्थापना गरेको छ । कोषबाट बर्से्नि प्रवेशिका परीक्षा, कक्षा ११ र कक्षा १२ मा उत्कृष्ट हुने विद्यार्थीलाई जनही रु २५ हजारका दरले पुरस्कार प्रदान गर्ने गरिएको छ ।
